Bi·sa duatgipa singer

Rome songnokni Raja Dal·gipa ong·ani ja·mano Nero-ni dakna nangnikaniara mande jinmani mikkango chadenge git ring·na ong·achim. Git ring·aniko alamala skie ra·chenga dake, ua an·tangni sikaniko chu·sokatna gita Naples-o mande jinmani mikkango git ring·na chadengaha. Nero Rajani git ring·ahaon manderang dongsiksaktokaha aro ring·a matchotgijan ong·katbildange kattokaha. Changgipinode Nero Rajaba seng·skaaha; darangba ong·kate katangna man·jana gita ua do·gacholo sipairangko dongtimataha aro an·tangde git ring·na chadengtaiaha. Uni git ring·taion manderang knana sikjabeoba chakchike dongna nangaiaha. Aiao! an·o donggipa me·chikrangde duchangpilaha, mitama na·chikkoltangtangko pakmarango pa·chape dongtokaha. Indiba sakgittam gisik seng·gipa manderangde ua biaponi altubeen ong·katbana man·aha. Maidake, u·iama? Uamangoni saksa sia dakmikaha aro sakgniara ua sia dakgipako de·tome ra·baa dake do·gacholo dongtimgipa sipairangko togina man·aha.