♥♥♥♥♥
Ka·sanapa? Aiao! mairongpile ka·tongo ‘jreng’ dakepilgipa katta. ‘Ka·sanapa’ inaton maiba muni gnanggipa dikge gingsikmana gita ong·pila! ‘Ka·sanapa’ inon nang·ni mikkango ka·dingsmitatgipa an·silrang chroka gita ong·rongama? Basakobade palango tue kodamtangkon gipakmanpilakonba mo? Indiba angade basakoba (obostani kri) ka·tong ‘jreng’ dakmanoba ka·dingsmitgipa mikkang dongrongja. Mongsongde, ‘ka·sanapa’ ingipa kattani ning·tua ning·tugija gimikkon anga an·tangde ong·ae ong·jae chanchibewale nimanaha, aro uni a·selan ka·dingsmitna man·jaengakon…
Indake aganako namnikgijagiparangnade ‘Englishan pilak namatgijani ja·dil’ ong·naba gnang! ‘Ka·sanapa’ inako ‘Fall in Love’ ine agana. Oe, Falling in Love! Aiao! ‘jreng’ dakangbebea. ‘Fall’ ba ‘falling’ inode maiko miksonga; uan ga·akako ong·jama? Fall ba ga·akara maidake ong·a? Uan balance man·gijani a·sel ong·a — ‘lost of control.’ Ramao na·a ga·akode an·tangko balance man·rikgijani a·sel ba ja·gitdotesa ga·aka. An·ching darangan an·tangni ga·akgniko u·isona man·ja – u·isoode ga·akpajawa da·nang!
Fall ba ga·akania pangnajolna ong·gijaniko mesoka; na·a ga·akoba chakatpilgen. ‘I’ve fallen and I can’t get up’ ine saniba git ring·akode knaa beben, indiba uan film ba gitni kattasa; asol janggi tanganiode an·ching ga·akon a·dimu dokpronge chakatpilaia, mata man·ode maiba samko nongataia. Balance man·rikjamitingo ga·akanga: balance man·pilo chakata. Ka·sanapania apsan daken: na·a an·tangni gisik ka·tongko balance ba control man·rikjaon ‘fall in love’ ong·gen, indiba control man·pilahaode ‘fall out of love’ ong·aigen. Ga·akkamgipani bidingode agankujaengane – unade a·kol tu·kalna nanga!
Fall ba ga·akania u·isona man·gijaniko mesoka (unpredictability). Drama dakengosa ba maiba movie-na shooting ka·engosa an·tangni ga·aka ‘dakgniko’ u·isona man·a. Indiba a·gilsako janggi tangania drama ong·skaja. Fall ba ga·akania chanchisojamitingosa ong·rongbata. Indaken na·a basako sana ka·sanapgen (fall in love) agansona ba manchisona man·ja. “Indita bilsini indita tariko amikkana ka·sanapgen” inode uan ‘falling in love’ ong·jawaha, haida ‘go to love’ inede ong·naba gnang. Indiba ‘love’ ingipara a·kol dal·gipa gitasa dakana — unonade ‘go’ ba ‘re·a’ inani kattan dongja; uni gimin, ‘go to love’ ong·ode uan a·kol ong·oba ning·chi megap ba high jumpna jakkalgipa tappujet dakgipa padko ansogipasa ong·enggen!
Fall ba ga·akode saknaakoba man·gen. Ga·aka ga·aka inkingkingengo saoba sa·dika man·gija dongama? Beben, uan obostani kri ong·gen; am·pokoni ga·akana bate chokkioni ga·ake saknaa man·ani biljimbatgen. Chanchie nibo: bike stand ka·e donao asonge roaoni ga·akode namkalkugen, indiba bike ta·rake salmitingoni ga·akrikosai(?) Ka·sanapa ba ‘fall in love’ ingipaba indaken ong·a; badita tu·e ‘ga·akanga’ inditan ka·tongni saknaakoba chagronggen. ‘Fall in love’ inahaode an·sengsimaigen, an·saosimaigen ine chanchinabe. Ka·tong saknaade mai, be·gimin ka·tong ingipaonan sokna man·a. Bike salao gadoaoni ga·akakon chanchiate nibo: ga·ake saknaa man·ania badita ta·rake ba ga·sue salangenga uni kri ong·gen, siaonaba sokgen. Helmet namako ganode naljokaniko aditan man·a. ‘Fall in love’ ong·anio saknaa man·aoni naljokna gita maidakgipa helmet nambatgen ukode angaba aganna pa·ja…
Fall ba ga·akania gelna amgijaniko mesoka. Jegita simsakbeoba basakobade ga·aktelaia. Darangan basakobade ga·akaia! Indiba na·a ga·akgnioni badita chel·e donga inditan uoni naljoke dongna man·a. Indiba ga·akteljawa inede aganna man·jawa; bolchongdik songdoe donamangba balminduri sokbaode ga·akaia.
Fall ba ga·akna gita an·ching miksongmanchaede man·ja. “Anga ga·akgen” ine na·a ga·ake niboching. Ga·aka daknade man·gen, indiba uan ga·akbebeaoni dingtangbegen. Haida, megap danako ba an·cheng ritchaako sandie ga·aka dakode ga·akbebea gitan aditade man·genkon(?)
Fall ba ga·akania basakobade kratcha·aniko man·ani aro man·si man·dik dakanikoba ong·atna man·a. Name chi·ronge tarie roramango banoba ga·ake chola ba·ra mitchiode na·a kratcha·akosan man·aia ong·jawa, mansi man·dikba dakgen. Indaken ‘fall in love’ ong·oba basakobade kratcha·a, gisik saa aro engtogijanikoba chagrongna nanggen.
Fall ba ga·akania mandeoba pangchaka. Bol maldosime roode, simsakgija bike-scooter salaiode, rama rimile namja ine u·ieba re·rame roaiode bachi ga·akgija ong·gen — ga·ak[simsim]aigen! Indake ga·akgipade name ga·akgipaba ong·jajok – simsakjae, am·e ra·tele ga·akgipasajok. Ga·akgni a·bakkukon dakode ga·akgen na·’de. Robol kal·ronggipa saksa angna agana: biade robol kal·aonikon ga·akgijani cholkoba nikana. Maidake? Bini nikani gitade mikka wao ramram ja·kopko gane kal·ode ga·srote ga·aksimaiana, indiba boots gane kal·ode rimiloba ga·akjana. Indiba bia agandapkua, “Boots ganrongpagijade ga·akgija kal·na man·paja baksanaba kal·rimskakon boots matatna kenchakani dongana!” Boots gane kal·rongtokbo…
Fall ba ga·akako gale ‘ka·sanapa’ ina mangmangkoba niate nibo. Ianode ga·akani gri indiba ‘napa’ inskaa. Haida, uan nokningona ganggu napa gita dakakon(?) Da·ororoni ganggurangde sam so·mikoba ‘che’ inangjaengjoksai! Mosori name bil·tingoba basakobade maidaken, bagitan napa u·inan man·ja. Napna man·jaoba na·a mosori nangchape tuode dangiataigen! Unode malaria jo·ongsa nang·onade napanggnok.
Chanchibewale niatangkode angaba aditan parakatjok. Indiba angaba ka·sine ka·sine ga·akroroanganikode u·inan man·telja!
Conditional Love
Conditional love ong·on uan ‘give and take’ ingipa bewalo gita ong·a. “Na·a angna ka·saa ine ku·rachakbo” ingipade conditional loveni gadango ga·aka. Conditional love inon nang·ni nangnikani ba namgni ong·aniko ra·bagnigipa ong·ani gimin ka·saaniko miksonga. An·ching conditional loveko man·enga ong·ode uan an·chingni nama ba namgijanio pangchaka. An·ching nikna man·a: an·ching classo namode, gisik nangode skigiparang an·chingko namnikbata. Ma·a paaba uandaken ong·ronga. Uamang bi·satangna ka·saa, indiba ua bi·sa badita nama uni krian una ka·saaniba ong·a. Beben, conditional love ong·oba “indake ong·ode inditana ka·sagen” ine miksongmanchae ba togrike nichengede ka·saaniko on·a ong·ja, ka·saaniko ong·atgipa gisikni bakan obostani kri an·tangarian ong·angaia. Indaken na·a saoba me·chikna conditional love-o pangchake mikcha-ka·saengon ua me·chik silbatangroroode, nang·na ka·sae dakbatangroroode, nang·ni namnika gita ong·batroroangode na·a una ka·saani batroroanggen. Uni gimin, conditional loveni definitionko on·nade Newton’s Third Law of Motion-ko taridapna nanggen: “To every action there is an equal and proportional reaction.”
Real Love
Na·a sanaba chong·mot ka·saode ba real love dongode ua mandeoniko maming man·pilskaanina chanchiani ba man·pilskaani grian una ka·sagen. Real love ong·ode nang·ni ka·sagipa mandeo sretani aro gualanirang donggenchimoba na·a una ka·sagen. Beben, uni dakguala aro sretanirangna na·a basakobade suk ong·jawa ba ka·onangnaba gnang. Indiba real loveode ua suk ong·gijani ba ka·onangania nang·ni ka·saenggipa mandeni namgnina chanchiani aro simsakani a·selsa ong·gen; uan nang·ni namnikgijagipa bewalo ong·ani gimin ba nang·na gimagni ong·ani giminde ong·jawa. Ua mande nang·na ka·saskapilani dongjaoba, nang·ko namrengaioba na·a una ka·saani dongaigen, maina real love ong·ode uan nang·ni an·tangni kusi ba namgnina ong·ja indiba nang·ni ka·sagipa mandeni kusi aro namgnina chanchianichisa ong·a. An·chingni poraibagimin gita, ‘falling in love’ ba ka·sanapanioba real love dongode indaken ong·a. Na·a sanaba ka·sanapmangmangachi una ‘chong·mot ka·sanapani’ gadangona soka ong·kuja. Haida uan conditional loveni gadangosa ong·kuenggen; na·a una mikcha-ka·saengani giminsa, uni ka·saako man·engani giminsa ba uni nitoa daknanganichi salangako man·anichisa ka·sanapengnaba gnang. Na·a me·asa ong·ode, saoba me·chikna na·a ka·sanapani ja·mano ‘real love’ dongahaon ua me·chik nang·na ka·sajahaoba, nang·nin ong·ani ari nalsaosa ong·oba, na·a una ka·saani donge uni kusi aro namgnina ka·suangkugen. Uni ortode, real love an·tangni ong·atna mikpakma nigijan ka·sana man·ani ong·a. An·tangni ong·atnaba man·genode baditan katchaani ong·genchim!
Chimik 
Leave a comment