Melkey Chisim
“A·gilsakko watangaha” ine Salantini Janera-o gatataniko an·ching nikronga. Indakgipa seanirango ‘Ua 2005 bilsini June 10 tariko siaha’ ine seja, indiba “Ua 2005 bilsini June 10 tariko jringjrotna neng·takna gita Pagipani rimangako man·aha” inesa sea. Uan miksonganide apsan ong·a, indiba ua miksonganiko parakatna gita kattarangko jakkalani bewalo dingtanggrikanisan ong·a. Indakgipa a·selrangosan ong·aija, indiba jeni bidingoba mandeska baksa agangrikanio ba golpo-alapanio kattarangko kra-bewalo jakkalna changna nanga. Pa L. D. Shira MBOSE-ni Secretary ong·engachim: unomiting angni ripeng saksa Secondary School-o skigipani kamna galaha, porikkakoba seaha. Adita antirangni ja·mano, Pa Shira-ko grongdike golpoon ua janapjolaha:
“Secondary School teacher-na chingni segipani result basako ong·gen Sir?”
“Na·ara School ka·na somoi jokgen; business-ming NGO-ni kamrangan jakchakjakonde na·ara?”
“Indakode angara man·jama Sir?”
“Ong·ja, man·jade ong·ja, on·teljakon…..”
Bachiba nang·ni ong·katna ine tariengon nang·ona saoba rona re·angdikode na·a ua mandena maiko agangen: “Aia! angade ong·katna am·engachimde….” ine? Beben, nang·ona sokanggipa mande sawa uni kri na·a aganna man·gen, indiba pilak mandenade uandakgipa bewalo aganchakna man·dika ine na·a nikgen. Mejao anga saksa mandeko grongna re·angaha. Uan attamni 2 bajimango ong·achim. Gue pan ra·bae on·ani ja·mano ua inaha, “Aiao ! sal ding·an bilongengamo… da·o 2:30-o meeting donga ingipachiba re·angnan neng·nike nikatengaha angade…” Gue srisa cha·kue, “Meeting ingipade indakaiasai, mongsonggipade mongsonggipa, soknan nangtelaia……. tarion ong·aignokke na·aba, hai ong·katchengaiboha” ine aganna dakana agre angna nambatkala chol dongjaha.
Kattarangko gisik gnange jakkalna changana aro agancholetna ta·rakani bidingo Birbal-ko mingsinga. Walsao Akbar raja jumang mingsako nikaha. Jumango uni wagamrang, chong·sana agre, pilakan be·tokaha. Uni indake jumang nikania maiko mesoksoa uko aganchina gita ua jumang pe·giparangko okamataha. Jumang pe·giparang uamangni gisepo adita chanchirimani ja·mano jajajiji dake rajana aganaha, “Hujur, nangni ma·drang mahari pilakan nang·na skang sitokgen ine nang·ni jumang mesoksoa.” Akbar namen suk ong·jaha. Uan mairongpile namjabegipa jumang ine ua inaha. Aditani ja·mano Birbal sokbaaha. Rajani inditan suk ong·jabee dongengako nikeon Birbal uni a·selko sing·aha. Akbar an·tangni jumangko aro uni miksonganiko jumang pe·giparangni pe·talate on·aniko Birbal-na aganaha. Unon Birbal inaha, “Aiao hujur, uamangni agana gita ong·ja, nang·ni jumangni miksonganide, na·a nang·ni ma·drang maharini gisepo pilakna bate tangbangbatgen inesa mesoksoa.” Birbalni indake aganon Akbar kusi ong·aha.
June 2005
Leave a reply to Dam’dam panchu B mrk Cancel reply